Messages les plus consultés

samedi 18 décembre 2010

حنيت


تعدى توا عام مريتش محبوبتي الغالية زعمة كبرت و زيانت؟
 مع الاسف منتصورش أكيد زاد بيها المرض , خليتها العام الي فات تاعبة برشا و مريضة, بالمرض الي مايبراش مرض خايب ;
نحبها و نعشقها و نتنفسها
وهي الي بقى من كل شي من ريحة الريحة
وهي الي مازال في يتحرك و يحس
وهي نقطة ضعفي
ومرضها الي عرفت توا سنين هو الي هزني و قسم ظهري.
نهار الي شفتها اخر مرة لقيتها حزينة
ومستقبلتنيش بضحكتهاوماداعبتش خصلات شعري,ما عانقتنيش,بستها من جبينها لقيتو بارد
,وطلعوا فيه دمامل,من فوق مرضها, و جيعتها,
مسكينة ياعشيرة عمري
,شفت اليد اليسار,و قلتلها وين خاتمك,قالتلي تكسر فصو ستنيت تجيو تبدلوه ما جا حاد
قلتلها راني توحشتك,قالتلي ماعادش في عمري برشا
,قلتلها نبات في حضنك ,نعيشوا و إلا نموتوا جميع
, جاني راجل لابس أخضر في أخضر و قالي إلي يحب و يحن يتوحش و قلبوا حي و عقلوا صاحي موش من حقوا يكون جنبها ,هي تحتضر و الحكم صدر, لازم تموت وحده
ا,قتلو خليني معندي كان هي ماعندها كان انا,
قالي,متعرفش إلي مرضها مخطر و خصوصا مالازمش يتنقل لشباب,خاطر انتوما الأمل
سألت روحي زعمة هالشيخ الأخضر فاهم حكاية عشقنا و محبتنا؟
منضنش,نتصور حافظ
بكيت ,ندبيت, عيطت,من غير صوت ولادموع
,نعرف الي هي متحبش ترى دموعي و لا قلبي المذبوح
,حسيت روحي
 تفترشت
,كل طرف وكل جزء يفركس عليها وعلي
,بعدة السيارة,وحدة أخرى ساقت موش,أنا وحدة أخرى فارقت موش أنا
زعمة ليلة في حضنك الدافي تعوضني على عمركامل تعدى؟زعمة تصويرة في خيالي متفارقنيش تعوضني بعدك,زعمة لو نرجع و ترجع تبرى و نبرىزمشيت نلوجلك على  الدواء
 و في آخر المشوار طلع هو الداء
فارقتها و دموعي سكابة,فارقتها و ذنبي عشقها و محبتها..
الحنين مرضي و مرضها,الحنين ذنبي و ذنبها,إلي يأمن بيه و ليه في برنا تضيع ثناياها وينسى و يتناسى .
توحشتك زعمة مازال في العمر بقية و نراك زاهيات أيامك و حافلة بألوانك.إنشاء الله عمري قبل عمرك.
قول صادق من قلب يحبك

samedi 11 décembre 2010

قصبة السعادنية

هاته الابيات نقلتها عن جدتي فاطمة بنت عبدالله خميرة و القصيد طويل و هو للمرحوم منصور خميرة وهو حوار بينه و قصبة السعادنية حسب ما وردني و اعرض بعض الابيات للافادة و الاستفادة بارائكم الثمينة و المثرية لنساهم سويا في انقاد موروثنا و داكرتنا الشفوية



يا قصبة كنتي عيارة تفكي من جيش الغوارة

كنتي تسمي في دولة بابي و عمي

و ها توا مشيتي في نمي

مهريك المقرس في بغباره

كنتي تسنيدة بيضاء زي الشمعة تضوي من بربعيدة

باب وقفل و مفتاح جديدة

ومولاك يشمشط عساس



منكم يا قلال الهمة

لا جا واحد يطلفح في كمه تقول ٢٠٠عبارة



لاباس عبدتيني من دون الناس

ماتحسابيني خماس نخدملك من غير اجاريا



والله تر كلب اجرب من غير وبر

سلعة باب بحر و زايد متربي في وسط  الحارة

lundi 22 novembre 2010

عينين أوداد

فكرتوش مرة تبدلوا تاريخ ميلادكم؟
ممكن فيكم شكون فكر، أنا خممت نبدل تاريخ ميلادي خاطر إلي صار ف نهار هذاك يستاهل أن نبدا نأرخ به حياتي طويلة كانت و إلا قصيرة، مختصر المفيد،
هو والحكاية صبت بهم أمطار العاصمة إلي في عادة بنسبة للي يسكنوا فيها  مش مطار خير اينما مصيبة،  لمع  كي لبرق إلي والله عندي برشا مشفتوش، كي قوس قزح سنين ماريتوش ، مش خاطر هو معادش يجي لكن خاطر أنا معادش نستناه، أنا معادش نخزر لسما معادش نحب نحلم ،تعدى شوية وقت وأنا نخزر لعينين مليانة حلم، فيهم تبسيمة، وجه أول مرة نراه، وروح نعرفها وريحة ماليا خواطري،منين جاء؟منعرفش ضهرلي من صحراء  ابرهيم الكوني ، ضهرلي المريد متاع حكايات الطوارق، زعمة ضاع في صحراء الحنين لين وصل لشوارع بلادنا،بلاد كل يوم تزيد تقتل فينا حلمة ومنامة، بلاد كل يوم تقتل فينا احاسيسنا،  نهار هذاكة باهي برشة خاطر ف نفس اللحضة تلمحتو فيها    شفت انسانة عندي 6 سنين مريتهاش ، استاذة التاريخ في الثانوي، سيدة فاضلة من جيل إنقرض،لمراة هاذي علمتني أبجديات التاريخ، و حب الحياة ورسخت المبادئ  إلي لوالد والوالدة زرعوهم فيا.فرحت برشة بشوفتي   فرحت بشوفت انسانة مغابتش من بالي توا سنين كيما هو مغابش من بالي توا شهر، ممكن حكاية تشبه لحكايات المراهقين.حاصل راجل عندو خزرة ساف وعينين أوداد، خطف فكري ومشى ياريت الوقت يرجع التالي وياقف في لحظة تمنيتها وستنيتها...مشى ومشيت قعدت الحكاية في بالي وضحكة عينيه وغناية وردة   تقول وحشتوني...نهارها حبيت العاصمة و سينما و عشقت لمطر وريحتها خاطرها من ريحتو،ستنيت يجي مع لمطرة جاية، مجاش و إلا خلينا نقول أنا ممشيتش.
حكاية حكيتها باش تحتفل معايا بعيد ميلادي الجديد.
 

   

 

خرافة

و احنا صغار كانوا كي يبنونا يغنيوولنا ومن بين الغنيات و- هي خرافة في نفس الوقت ولا خلينا نقول جزء من خرافة- حكاية ليوم ، أيا مالا أقراو واعطوني رايكم وقولولي زادة انتوما اش تفكر من سغركم وم من غنياتو


هو مقطع قصير يتعود لكن فيه برشا حاجات تستحق اتحليل وادراسة .
"يا عبدالله يا ممي تمزا تزاد ايدي، اى شبشوبيس د زوقغ(azouguagh)، تطاونيس أم أزلاغ ،تيرد سبعة ن زوزاغ، يلعن بابيك اسباغ..."
  ترجمة:
"يا عبدالله يا ولدي "تمزا" تنسج معايا ، شعرها أحمر ، وعينها كي العتروس ، لبس سبعة ودعات، يلعن جدك اصباغ..."
فما اختلافات ف ترجمة وحتى ف خرافة بيدها بين عرش وعرش .
فما عنصر مهم وهو قيما عليه الخرافة ف دويرات وبرشة قرى أمازيغية أخرى وهو" تامزا"، وتامزا هو شخصية خرافية و ساعة قد ميحكو عليها ويصفوها ويدعو لكل أنهم شافوها ناس تميل الأنها تصدق وجودها ، منجموش نترجم كلمة تامزا لغولة خاطر  مهمش نفس شخصية وماعندهمش نفس الأوصاف الجسدية وحتى انفسية ، الغولة ديمة نصفوها على أساس   نصف إنسان و  نصف حيوان ولا ساقيها ساق ادمية وساق فيها حافر معزة ولا بهيم.تامزا مراة وساعات مراة مزيانة برشة وحافلة (لابسة لبست عروسة معناها، مش حافلة كار إلي نركبوها)  ، تمزا ف مخيال الامازيغ" génie  " ، مهوش بضرورة شرير ويعمل حاجات خايبة. لا خاطر هي تنجم تجي تعاون مراة تاعبة وشاقية ف دارها، بطبيعة قبل نساء كانوا يعملوا كل شي يجيبوا الماء وحطب و- يرميو ا الخبز ف طابونة ويغزلو وينسجوا وبرشة هي الحاجات إلي يعملوها كل يوم و احنا ليوم زيت ف الكوز وخبزنا مخبوز و أحنى نشكو ونبكيو ونقول تاعبين صحيح هما كانوا تاعبين أما قلوبهم كانت راضية ودنيتهم بسيطة وجميلة.حاصل تامزا ت نجم تهديلك ثروة إذا  إنت طيب وعامل الباهي.
ناس قبل فيهم نية وطيبين لكن اش معناها أنها تتعدى عليهم بالعكس كانوا فطان، مماتي تقولي أنا ميمتك تربيت ييتمة أما عمري  محسيت ليتم، لكل خوالي ولكل أعمامي، وقد مصعبت lدنيا  ماكناش نشكيو، وكنا كي نتلمو على كاس تاي باش نغزل شوية   صوف ، كانت ضحكتنا طالعة من قلب، واحنا اليوم حتى ضحكة معادش طايلينها.ممكن نقولكم إلي قبل كان كي واحد يحب وحدة واهلها ميوافقوش يهرب بيها وينجم يقتل على خاطرها حتى 40 عبد ويقولك على خاطر نحبها، ليوم في وسط هل مجتمع إلي كلو تناقضات إلي فيه كل شي مسموح وممنوع ، وناس تحرم وتحلل على كيفها ، بلاد فيها باش تولي تهمتنا فيها أنا نفكرو أو حتى نتبسمو، حتى واحد فينا ما قادر أن يدافع على واحد من اختيراتو،أبدا مني أنا،حصل كثرت عليكم بدوة،على فكرة نتصور أنا كان يعطونا  الحق أن نختار تو ما نختاروش خاطر معادش نجمو.
كلمة دوة، أصلها أمازيغي حسب رايي خاطر أحنا نقول "ادوي" والمقصود كلام.
أكيد بش نحكيلكم واحدة من خرافات مماتي.
 

lexique:
ممي= ولدي
تزاد= تنسج
ايدي= معايا
زوزاغ= ودعة؛صدفة
شبشوب= شعر (معنى سلبي وصيغة تحقير)
زاو= شعر
تطاوين=عينين
أزلغ=عتروس
(كلمة دوة، أصلها أمازيغي حسب رايي خاطر أحنا نقول "ادوي" والمقصود كلام.)  
                                                 تنميرت
     

mardi 9 novembre 2010

الكل قد نسوا أسماهم.. من بعد ما نسوا لكنتهم..واقتربوا.. يقهقهون ، أو يبتسمون، مأسعدهم.. لأنهم.. قد فقدوا الذاكرة التي تحزنهم- سعيد سيفاو

الكل قد نسوا أسماهم.. من بعد ما نسوا لكنتهم..واقتربوا.. يقهقهون ، أو يبتسمون، مأسعدهم.. لأنهم.. قد فقدوا الذاكرة التي تحزنهم- سعيد 
 سيفاو

نسأل روحي ساعات   زعمة ذاكرتي نعمة ولا نقمة ، هي حزني ولا فرحي منعرفش نجاوب ،كثروا علي الحكايات و اذكريات ، ساعة نتمنى ننسى و نفقد إذاكرة  نقول بالك نبرى من أوجاعي، من بعد نقول فيها لحظات  حلوة صحيح قليلة أما هي إلي نستمد منها ضحكة و تبسيمة،

حكاية ليوم هدية مني لصديقي حاكم نرملند :
و أحنى صغار كنا كيما نغنيو للمطر نغنيو لشمس كنا نغونو ونقولو "أزرق اتفويت بش أميغ تنعنويت أم ال فردة نتسيرت  أي مم عبدلله"و ترجمة    الغناية هو" أطلع يا شمس بش نعملك خبزة قد فردة ارحا لولدك  عبدالله " لغريب أنا من بلاد فيها ديمة شمس زارقة أما كانت كي تغيب شوية نفقدها وعلى قد مكنا نستاو المطار بش نعيشو ونشوفو ضحكت جدودنا إلي نشوفها من مطرة المطرة ومن صابا ال صابا  وتعرفوا ف مناخ كي مناخ بلادنا صابا تجي كل وين و وين ، حاصل كنا ندورو واحنا شادين يدين بعضنا وروسنا ف سماء كنا نفرح كي تجي كاينا ملكنا دنيا ،كنا نتخيل شمس مرا وعندها وليد اسمو عبدالله وتستنى منا في خبزة، خاطر جداتنا صورلنا القمرة وشمس مراة عملت حاجة خايبة ومصنتش إنعمة إلي هي الخبز يخي ربي عاقبها وعلقها لفوق ،كنت نقول لأمي: زعمة هذي عقوبة قاسية برشة، على خاطر أنا كنت نحلم ب سما وشنوا فيها ، وبنجوم وحكايتهم وغنياتهم ، كبرت وقعدت كان ذكرى ومعادش نغني لا لشمس ولا نستنى لا قمرة و لا مطرة  ، ممكن خطرني كبرت ولا ممكن خاطر تعبت وأنا نستنى ف كل شي مجاش ، كل شي قاعد يمشي  صحابي وناس إلي نحبهم شي خذاتو دنيا وشي خذه الموت وشي خذتو الغربة، ساعات تعذبنا ذكرى وذاكرة.اه يا جبالي اعطني صبرك وذاكرتك...
 











dimanche 7 novembre 2010

souvenirs

bech nahki hkayet tofla sghira twaldet fi bar b3id, f jbal ma3rfetech fih barcha alwan ama 3arfet fiha eloun el ha9ani mta3 sa3da, haja mba3ed ki mchat lel mdina ma3arfethach.lmochkla eli ki t3ich f wassat s3ib barcha twali 3andek 9odra 3ajiba 3la ta29lom, taw t9oulouli 3lach mochkla 3la 5ater m3a a29lom b souri l'intégration tabda te5sser rouhek w tabda tdhi3 f wast denya w thezek w tohreb bik w mata3refch tarja3 sa3at l rouhek w l jbalek eli habetek w habatek w hmatek.m3a ha tofla l hkaya kanet ghriba awal daress w hya 3morha 4 snin mansatouch, daress men 3and omha(yadjiss),9altelha f 3chya(tamedit) mel 3chweyat w homa 3 dokan(f doukan) 9odam(zdat) dar(tidaret): seghd a yelli: asma3 ya benti lazem tetkalem bel 3arbi, ma3adech tetkelm be klamna(to9ssed be chelha).men hna bdat hkayetha w rehltha, w kelmet bouha kanet dima"tounes, touness w testanes w tayess nassek".w l9at rouh'ha f tunis, ch ta3mel bech ta9ra w tet3alem ka ahssan ma yakoun, w 9rat bel 3arbi w b souri w b l anglais...w kan lzem b chinois ama ma9ratech loughetha eli kbret fiha w biha,f 5rafet mamet'ha(nannas), w f drouss omha, ey omha eli 9altelha lazmek tetkalem bel 3arbi w hya makanetech tnajem tkalamha bel 3arbi.kbret bentna w kbret hkayet l mhaba w kber fiha soghrha w dhkrayat jbal manajmetech theb ghirou w tchem riha o5ra ghir rihtou, rihet ttin(taghouri), rihet mamat'ha, rihet ma5n9et tib(charka b 3oud l 9ronol) f ra9bet'ha, sout el baroud f mahfel mel mhafel, nar bouharass, la3bha be dergala, massyed el gondi...matnajamech tansa w matnajamech mat'henech ba3d snin, l mhaba walat 3ech9a, w walat helma matfare9hach.ba3d 20 sna, ch b9a men soghr'ha w dhekryat'ha???ki mchat l9at ghar(irji) om'ha w bou'ha eli tweldet fih, mazal f blastou ama ma3adech fih nafs riha, rihet l gaza w rihet b5our(tisarghin) om'ha, mazalet fiha rihet rmal el ahmar(ijdi azougagh), twahchet 5obez mamet'ha rokbet mamet'h, thay'ha...ta3rfou twahchet hata rakba f 404 -(mouch mta3 3ammar rahou)-rakba f l bachya w bab'ha el 9odami eli maynajem yhelou kan moula'ha w tableau de bord eli yda5en...
lyoum mel blad eli kanet 3amra w kbira w 3rass'ha hafla w hess'ha masmou3, mab9a kan 2 wala 3 3yal chwaya yestana fel mout w chwaya yestana f sghir ya5ou 6ème bech yemchi lel mdina, w mdina theb tsaker el maderssa w t'hot nihaya l hkayet sogher, bdat toufa b fadhel el 3awlma w ta29lom w bfadhel el ma w dhaw w bfadhel a din el jadid w tha9afet el hram w el hlal, ana zada kifha twahachet lametna 3la nar bouharss f 3achoura wala f rass el 3am;hram wala hlal! l hram anou soghrha w soghrna ydhi3 l hram anou el kenz eli hdathoulha "tamza" tesre9oulha "el ghoula".

Azul, aya 9olna marahba

Azul,
ya sada ya mada allah ydelna w ydelkom l chhada, ana rani 9al9a w haba nahki m3a nass, tnajmou t9oulou denya dhya9et chwaya bya.ti ch 3lina, taw barcha y9oulou chnowa hkayet "Azul", hadhi kelma b lsan TWAREG wala 5alina n9oulou bloghet'hom, w ma3na el kelma "9rib mel 9alb" w houma y9oulouha kima ahna n9oulou "salam" wla"salut" w bin tlatha kilmat ana 5taret "azul" 5ater netmana tkoun lkol 9rab men 9albi, ama esm l blog el howa "tirjitmnama", fa "tirjit" ma3naha mnama wala helma, w kelma hadhi belsan el amazigh wala kima y9oulou f ktob bel barbarya, mo5tsar lklam bechelha, mta3 tounes.barcha menkom akid machi fi balhom ha logha in9ardhet, ama lazem taw ybadlou rayhom w ya3rfou ei mazalet haya torza9 f bladna. hassel ma3nah kima y9oul jedi,hadha mahou kan ta93id l3oud w sahryetna wala 5alina n9oulou hkayetna mazalet touila, hkayet soghr,hkayet helma, hkayet amal...mat9t3ouch el amal.